ШИД – Зоз шветочну академию, хтору орґанизовали члени Културно-просвитного дружтва „Дюра Киш“ вчера вечар у Руским доме, Руснаци у Шидзе означели Националне швето Руснацох у Сербиї.
Шветочна програма була у знаку означованя 100-рочнїци снованя Руского народного просвитного дружтва (РНПД) о чим публику здогадли у викладаньох наставнїца Златка Сивч Здравич, поетеса Саня Тиркайло и Вера Дупало.
Мишана шпивацка ґрупа у провадзеню оркестра Дружтва, окрем державней гимни и шветочней шпиванки Руснацох, представела ше и зоз венчиком руских народних шпиванкох, а Мирон Джуджар пречитал писню учителя и писателя Михайла Ковача „Младим на памятку“.
Тиж на видео биме указани и виривок монодрами автора, ґлумца и режисера Венямина Бульчика „Судьба або дацо инше“ з нагоди 10 рокох од першого виводзеня.
У сали Руского дома з тей шветочней нагоди були виложени малюнки Андєлки Античевич, малярки зоз Беркасова.
После академиї отримани коктел, а окрем нащивительох зоз Шиду, госци пришли и зоз Беркасова, Бикичу и Бачинцох.
