ЗОМБОР – Вчера, з уключеньом до Дньовнїку на 17 годзин, отворене Дописовательство Радио-телевизиї Войводини у Зомборе, чийо новинаре буду провадза збуваня у Заходнобачким и часци Южнобачкого округу. Пре визначованє мултикултуралносци штредку, дописовательство будзе емитовац змисти на штирох язикох: сербским, мадярским, горватским и бунєвацким.
На отвераню Дописовательства у Зомборе присуствовал и покраїнски секретар за културу и явне информованє Славиша Ґруїч, котри гварел же медийске покриванє местох по Войводини барз значне за гражданох и явни интерес, а Войводина як вецейнационални, вецейкултурални и вецейязични штредок муши мац таку файту одношеня ґу шицким своїм гражданом на шицких язикох. З нагоди отвераня Дописовательства, директор Радио-телевизиї Войводини Срдян Михайлович визначел же моцна мрежа дописовательох барз значна за функционованє того явного сервису.
– Радио-телевизия Войводини себе поставела циль змоцнїц дописовательску мрежу, прето же єй змисти и програма маю буц обрацени ґу цалей Войводини и же би з нєй було цо вецей информациї – гварел Михайлович и додал же РТВ будзе обрабяц каждодньово теми хтори значни за гражданох.