РУСКИ КЕРЕСТУР – У Kатедралней церкви св. Оца Миколая вчера вечар була Майсторска служба Божа, хтору ше по длугей традициї служи у половки Вельконоцного посту.
На Служби, на чолє з предсидательом Владимиром Емейдийом и членми Управного одбору керестурского Здруженя ремеселнїкох и приватних поднїмательох, було присутне и красне число активних и пензионованих членох и їх фамелиї.
По традициї, на своєй Служби двоме члени Здруженя швичкаре, а у часци Служби по преношеню дарох, члени Здруженя зоз запалєну швичку и обиходзеньом коло олтара з тей нагоди давали добродзечни прилоги своєй церкви.
Службу предводзел парох о. Михайло Малацко, а сослужели капеланє о. Владимир Медєши и о. Михайло Шанта.
Парох о. Малацко членох Здруженя поволал же би вєдно з цалу Церкву участвовали у духовним преглїбеню Святого рока и вихасновали його дари, а Служба закончена з Панахиду за шицких покойних майстрох и поднїмательох.