РУСКИ КЕРЕСТУР – У Основней школи „Петро Кузмяк” од пондзелку, 28. децембра, почало витворйованє проєкту „Активни жимски розпуст”, у хторим участвую коло 40, углавним школяре нїзших класох.
Тот рекреативно-едукативни проєкт одобрени од Покраїнского секретарияту за спорт и младеж, на основи конкурованя, а обдумали го професоре класней настави Славко Надь, котри водзи спортску часц, и Мелания Рамач и Ясмина Сабадош едукативну.
Рекративно-спортске друженє дзецох ше отримує кажди дзень (крем на швета) у физкултурней сали Школи, дзе дзеци робя рижни вежби и уча елементи рукомету. Окрем активного жимского одпочивку, як гварел Надь, дальши циль того проєкту створиц и єдну добру рукометну екипу Школи.
На едукативних друженьох „Активного жимского розпусту” буду роботнї о воспитних темох, як цо то краснє справованє, одношенє ґу старшим и подобне, та о гиґиєнских звикнуцох.
Под час проєкту керестурских школярох нащивя и школяре и їх наставнїки з Дироню, Сонти, Крущичу, Червинки и Дюрдьова.
Шицки школяре керестурскей Школи хтори участвую у тим активним розпусту достаню маїци, а Школа и нови рукометни лабди.