РУСКИ КЕРЕСТУР – После промоциї кнїжкох и стретнуца з писателями, у голу до Велькей сали Дому култури Руски Керестур у рамикох Културней манифестациї „Костельникова єшень“ отворена вистава з назву „Приватни живот Руснацох у 19. и 20. вику през приватни документи“ автора ма Сашу Сабадоша, историчара, котри тот проєкт витворел у сотруднїцтве зоз Заводом за културу войводянских Руснацох.
Вистава през седем сеґменти провадзи живот Руснацох у Бачкей, Сриме и Славониї од конца 19. по половку 20. вику, и то през каждодньови живот, школованє, войско, финансиї, польопривреду, ремеселнїцтво, та вирски живот.
Зазберованє документох почало у другей половки 2014. року, кеди у медийох на руским язику обявена поволанка гражданом же би подаровали, лєбо пожичели документи з прешлосци вязани за спомнути животни циклус. Подаровани даскельо стотки документи од 1840. по 1950. рок, на основи чого направена селекция, з тей нагоди Сабадош и окреме подзековал даровательом.
Виставу отворел о.д. директора Дому култури Руски Керестур Йоаким Рац, вєдно з єй автором, а понеже у голу Дому култури будзе виложена и цали идуци тидзень, по конєц Манифестациї, поволали шицких заинтересованих же би ю пришли опатриц. Тиж визначел же виставу орґанизовано нащивя и школяре керестурскей Школи.