РУСКИ КЕРЕСТУР – З привитом коло 80 младих з наших местох, у Руским Керестуре штварток, 28. юлия, почал треци по шоре Водицов камп, у орґанизациї младих Каритасу. За штири днї, кельо тирва Камп, активисти маю забавни роботнї и дискусиї, спортски бависка, медитацию и рижни активносци з духовнима елементами.
– Пробуєме преглїбиц духовни теми, же бизме младих здогадли на духовни живот. През рижни змисти ше намагаме упознац, зблїжиц з другима. На Кампу обрабяме седем дїла милосердия, а тот рок специфични по тим же, окрем пароха о. Михайла Малацка, о тих темох бешедую и нашо парняки – Михаела Еделински, Соня Виславски и Себастиян Надь, цо добре, прето же так теми приблїжиме ґу младшим – гварел єден з лидерох тогорочного Водицового кампу Александар Планкош.
Седем дїла милосердия, о хторих млади слухаю и дискутую на Кампу, то „кривду подношиц, гришного наврациц, нєукого подучиц, засмуценого порадзиц, смутного поцешиц, вини одпущац и за живих и мертвих ше модлїц”.
На Кампу участвую млади од 13 по 19 роки з Руского Керестура, Суботици, Коцура, Кули, Вербасу, Беоґраду, та з Канади, а змесцени су у просторийох Парохиї и у Водици.
У орґанизованю и витворйованю Кампу младим помагаю и старши члени Каритасу, а орґанизаторе окреме подзековни людзом з валалу, котри им и того року барз помогли з дарованьом поживи за учашнїкох.