КОЦУР – У Пелетовей сали Коцурске здруженє младих „КУМ” вчера орґанизовало Новорочни бал, котри бул источашнє и дочек Нового року по юлиянским календаре.
На Балє були коло 150 особи, а окрем Коцурцох, були и госци зоз Руского Керестура, Нового Саду, Вербасу, Бачкого Доброго Поля и Ветернику.
Госцох на балє розвешельовал оркестер „Кикирики бенд”, а млади ше до рана вешелєли зоз музику на руским и сербским язику.
За шицких нащивительох була орґанизована богата томбола за хтору дарунки даровали числени спонзоре, а главну награду – бициґлу, достал госц зоз Бачкого Доброго Поля.
