КОЦУР – Вчера у Доме култури у Коцуре основани Орґанизацийни одбор за преславу 70-рочнїци колонизациї людзох з Босни и Герцеґовини до Коцура, а инициятор преслави Културно-уметнїцке дружтво „Завичайне врело”. Преслава будзе два днї, а плановане ю отримац 13. и 14. мая 2016. року.
Схадзку водзел предсидатель КУД „Завичайне врело” Ненад Павич, а присуствовали члени Управного и Надпатраюцого одбору Дружтва, представителє Месней заєднїци, месних здруженьох и институцийох, як и особи котри участвовали у орґанизациї преслави 60-рочнїци колонизациї.
За преславу планована богата програма у хторей, попри КУД „Завичайне врело”, буду участвовац и други валалски здруженя. Буду орґанизовани спортски бависка, вистави, шветочна академия, културна програма и други змисти, а орґанизаторе планую видац и моноґрафию.