КОЦУР – Вчера у Коцуре отримана сновательна Скупштина Здруженя малинарох „Бачки малинаре”, а за предсидателя Здруженя вибрани Виктор Ґрешак.
На Скупштини у Малей сали Месней заєднїци присуствовали коло 20 продукователє малини, як и тоти котри планую почац з єй продукцию, а як дознава Рутенпрес, заинтересованих за членство у Здруженю „Бачки малинаре” єст коло 30. Тераз вкупна поверхносц под малину членох Здруженя коло 10 гектари.
На Скупштини прилапени Статут Здруженя и вибрани його орґани. Предсидатель Виктор Ґрешак за Рутенпрес виявел же Здруженє озноване же би продуковательом олєгчало процес продукциї – черало ше искуства и давало поради, лєгчейше набавяло хемийни и други средства и орґанизовало одкуп малини.
Продукция малини у Коцуре за остатнї даскельо роки нагло звекшана, а число продуковательох и далєй рошнє. За продукцию малини векшином заинтересовани младши особи, цо було видно и на сновательней Скупштини Здруженя малинарох.