У Коцуре отримане перше тогорочне преподаванє за польопривреднїкох

автор злк
762 Опатрене

КОЦУР – У Велькей сали Месней заєднїци стреду, 23. януара,  Польопривредна фахова служба Вербас орґанизовала перше тогорочне преподаванє за польопривреднїкох у Коцуре котри тримали фаховци зоз обласци польопривреди.

Коцурски парасти на преподаваню од Катарини Радонїч могли дознац на котри способ найлєпше защициц шаца од коровчох, котри гербициди треба хасновац, а Владимир Ранков польопривреднїком бешедовал о прикармйованю зашатих културох, упознал парастох о структури жеми у коцурским хотаре и прецо значне випитац жем на котру ше садзи або шеє.

Йосип Петрич, єден зоз преподавачох, заинтересованих поинформовал о польопривредних конкурсох на котри польопривреднїки можу апликовац и о условийох за одоброванє поєдиних средствох за помоц парастом.

Окрем того парасти од Милана Косовца могли дознац на котри способ треба отримовац польопривредну механїзацию и як мож звекшац ефикасносц дзепоєдних машинох.

Преподавнє було нащивене, а у наиходзацим периодзе у Коцуре буду орґанизовани ище даскельо подобни преподаваня на котрих свойо продукти буду представяц защитарски хижи и хижи котри продукую рижни гибриди польопривредних културох.

ПОВЯЗАНИ ТЕКСТИ