КУЛА – Вельки огень хтори пондзелок вечар вибухнул у спа центру „Музей” у Кули, помедзи Ленїнову улїцу и улїцу Маршала Тита, после скоро двох годзинох загашени дзекуюци огньогасцом и гражданом хтори пришли помогнуц.
У гашеню огня участвовали вецей огньогасни екипи хтори приходзели зоз околних местох, а як мож дознац у огню на щесце нєт покалїчених.
Урядово информациї о тим прецо настал огень ище вше нєт, а спрам нєурядових информацийох огень вибухнул у сауни а потим ше преширел на просторию дзе базен, пойд и кров, та ше и зоз далєка могло видзиц як пламень бухци на крове помедзи будинки у самим центру Кули.
Материялна чкода велька, а о тим же чи єст даякей чкоди на будинкох коло спа центру будзе ше знац накадзи ше окончи вишлїдзованє.