КУЛА – Нєшка на Вельки пияток у парохиї св. Йосафата на 15 годзин будзе Вечурня зоз покладаньом плащанїци и Єрусалимска утриня, а потим вирни парохиянє годни присц (по предписаних мирох) до церкви и кратко ше помодлїц пред Божим гробом док нє почина полицийна годзина.
Шицки шлїдуюци богослуженя буду ше отримовац у полицийней годзини, а як дознаваме од капелана о. Платона Салака ЧСВВ, у тей парохиї нєт можлївосци преношиц богослуженя прейґ интернету, та вирни лєм духовно можу буц повязани з нагоди того найвекшого християнского швета.
На Вельку соботу священїки у церкви на 7,30 годзин буду служиц Царски часи, а на 15 годзин Єрусалимску утриню. На нєдзелю, Воскрешенє Христово, будзе лєм пасхална Литурґия зоз пошвеценьом паскалного єдзеня на 5 годзин рано, Вечурня на 17 годзин, а пасхална Служба у Крущичу нє будзе.
Розказ и здравствени мири Кризного штабу Влади Републики Сербиї предвидзую забрану сходох векшого числа людзох, медзи присутнима муши буц одстоянє од минимално два метери, зменшани дружтвени контакт, ношенє защитней опреми (рукавицох и маскох) и почитованє справованя у складу зоз очуваньом общей безпеки под час епидемиї и позарядового стану.
Фаховци з обласци здравя совитую же би ше на швета остало дома.