КУЛА – У Кули нєшка, 17. юния, почина 58. Републични фестивал аматерских театрох Сербиї, тирва по 25. юний, а у змагательней конкуренциї участвую осем представи.
Фестивал нєшка почнє з представу домашнїх з кулскей општини – драмских аматерох Дому култури з Червинки „Чудо у Шарґанє” Любомира Симовича, у режиї Радоя Чупича, а по пияток на сцени Културного центру (КЦ) буду виведзени представи аматерох з Рачи, Враня, Костолцу, Боґатичу/Прнявору, Беоґраду, Сенти и Старей Пазови.
Фестивал на соботу, 25. юния будзе заварти з преглашеньом побиднїкох и госцуюцу представу „Лизистрата” Театру „Пременка” з Нового Саду.
Фестивал ма и провадзацу програму, та нєшка на 19 г. у Ґалериї Културного центру будзе отворена вистава малюнкох Бранка Маравича, а на пондзелок и стреду (на 22 г. у Малей сали КЦ) будзе проєкция филму о недавно упокоєним познатим ґлумцови-аматерови з Червинки Винкови Ступарови, котри ґлумел у вецей местох у кулскей општини.
Фестивал нєшка будзе отворени з традийним палєньом факльох опрез КЦ и дзвиганьом фестивалскей застави, а шицки представи починаю на 20 годзин.
Фестивал орґанизую Союз аматерох Сербиї, Културно-просвитна заєднїца Општини Кула, Културни центер Кула, а покровитель Фестивалу Општина Кула.