КУЛА – Спрам урядових податкох з Општинскей виберанковей комисиї, на виберанковим месце число 11 у Кули (у Месней заєднїци „Долнї город”), виберанки понїщени пре процедурални гришки виберацкого одбору, так же там виберанки буду повторени.
Пре повторйованє, Општинска виберанкова комисия ище нє могла сообщиц службени резултати гласаня, алє по нєурядових, на виберанки за вибор одборнїкох до Скупштини општини Кула у цалей кулскей општини внєдзелю гласали 20 638 гласаче, цо виноши 56,24 одсто з 36 699 уписаних до виберацкого списку. Нєважаци лїстки на шицких виберацких местох у општини було 674.
За 37 одборнїцки места змагали ше кандидати з 12 виберанкових лїстинох, а найвецей гласи достала Сербска напредна странка, односно єй лїстина „Александар Вучич-Сербия победзує – 8 176, цо 40,98 одсто важацих гласох.
На другим месце лїстина „Проф. др Велибор Васович-Социялистична партия Сербиї” зоз 2 081 гласом, лєбо 10,43 одсто, а треца лїстина ДС – „Сиґурно лєпше-Демократска странка, др Йован Янич”, хтора достала 1 978 гласи, лєбо 9,91 одсто.
Лїстина „Єдинствена Сербия-Драґан Маркович Палма” достала 1 784 гласи, лєбо 8,94 одсто; лїстина „Др Воїслав Шешель-Сербска радикална странка” 1 090 гласи – 5,46 одсто, а лїстина „Герцен Радонїч Кека-Русийска странка” 936 гласи – 4,69 одсто.
Шлїдзи лїстина „Союз войводянских Мадярох-Иштван Пастор” зоз 914 гласами – 4,58 одсто, лїстина „Лиґа социялдемократох Войводини-Ненад Чанак-Желєна еколоґийна партия-Желєни-Деян Булатович” зоз 725 гласами – 3,63 одсто, а на дзевятим месце по числу достатих гласох лїстина колациї „Сербски рух Двери-Народни рух Динара-Дрина-Дунай”, хтора достала 684 гласи, лєбо 3,43 одсто.
„Сербска народна партия-З народу за народ” у кулскей општини достала 607 гласи – 3,04 одсто, Ґрупи гражданох „Поднїматель” 509 гласи – 2,55 одсто, а лїстина „Борис Тадич, Чедомир Йованович-Союз за лєпшу општину-ЛДП-СДС” 467 гласи, лєбо 2,34 одсто.