У „Ладочки” и приповедки по руски

автор ртв/зам
881 Опатрене

НОВИ САД – У Новосадскей новинарскей школи вчера отримана промоция проєкту „Ладочка – авдио сказки на язикох националних меншинох”, у хторим и приповедки за дзеци по руски.

На конкурс були приявени вецей як 50 приповедки за дзеци, а за обявйованє вибрани осем на пейц язикох националних меншинох – мадярским, горватским, румунским, словацким и руским.

Медзи осем вибранима и два приповедки-сказки нашей писательки за дзеци Меланиї Римар – „Мудре праше” и „Ботоши важни”, а наратор обидвох Мая Зазуляк.

Як гварела Мелания Римар, за ню вельки успих и припознанє же медзи осем сказки вибрани и два хторим є авторка, а проєкт оценєла як барз добри, бо слухаюци сказки на своїм мацеринским язику, дзеци го годни лепше научиц, а тиж и слова з других штирох язикох.

Авдио-приповедки доступни и шлєпим и слабовидним дзецом, шицки осем приповедки-сказки звучно обробени, илустровани, преложени су и на сербски язик и доступни на сайту Новосадскей новинарскей школи, на линку https://www.novinarska-skola.org.rs/sr/?page_id=4204 Проєкт потримало Министерство култури и информованя Републики Сербиї.

ПОВЯЗАНИ ТЕКСТИ