У локалних самоуправох дац векши инґеренциї националним совитом

автор сен
1.1k Опатрене

БЕОҐРАД – Положенє припаднїкох националних меншинох, та националних совитох националних меншинох на шицких уровньох держави, препущеня у законох хтори то реґулую, були даєдни з темох Националней конференциї „Ґу политики интеґративней мултикултуралносци у Сербиї“, хтора пияток, 20. марца, отримана у Беоґрадзе. На Конференциї присуствовали представителє Влади Сербиї, европских институцийох, цивилного сектору, та представителє националних совитох, а спред Националного совиту Руснацох бул предсидатель його Вивершного одбору Желько Ковач.

Стретнуце орґанизовал Центер за виглєдованє етницитету, понеже Сербия у периодзе кед ма принєсц значни одлуки о дальшей политики у обласци мултикултурализму.

– Пре почитованє стандардох и правох о людских и меншинских правох, хтори од Сербиї вимага Европска уния, права и можлївосци националних меншинох положени на папер, медзитим у пракси ше их нє витворює. Постої вельки проблем у одношеню медзи националнима совитами и локалнима самоуправами. На приклад, кажда локална самоуправа у рамикох скупштини општини би мала мац Совит за медзинародни одношеня, та наведзене же у велїх општинох тоти совити постоя на паперу, нє активни су. Нїхто нє контролує чи вони наисце робя, бо зоз законами нє доповедзене хто то ма робиц – гварел Ковач.

Винєшени и проблем финансованя националних меншинох у локалних самоуправох, дзе, по законє, у општинох дзе єст вецей як 10 одсто припаднїкох националней меншини, локална самоуправа з буджету ма видвойовац видвойовало одредзену суму пенєжу, цо даєдни нє применюю.

6-BGD-02

Хаснованє язика и писма тиж проблем, бо гоч язики дзепоєдних националних меншинох маю статус службеного, гражданє у велїх установох нє маю можлївосц озвец ше на мацеринским язику.

Деполитизация националних совитох тиж була тема о хторей ше дискутовало, медзитим, ище вше нє винайдзени модел як ю запровадзиц. Виход политики з НС окреме чежко вивесц у националних меншинох хтори маю свойо моцни политични странки, як цо то Мадяре, лєбо Бошняци, гварел Ковач о поведзеним на Конференциї.

У Законє о защити правох и шлєбодох националних меншинох и Законє о националних совитох даєдни обласци добре реґуловани, алє можу буц и лєпши. Прето представителє Министерства за державну управу и локалну самоуправу на Конференциї усмено обецали же ше по 2018. рок, кеди маю буц идуци виберанки за национални совити, тоти закони пробує обєдинїц до єдного, хтори будзе добри и у теориї и у пракси.

ПОВЯЗАНИ ТЕКСТИ