У Митровици на ютре шветочносц з нагоди двох ювилейох

автор влдї/код
976 Опатрене

СРИМСКА МИТРОВИЦА – На ютре, соботу 29. октобра, у Сримскей Митровици будзе шветочносц з нагоди 130-рочнїци грекокатолїцкей парохиї и 110-рочнїци грекокатолїцкей церкви Вознесеня Господнього у тим городзе.

Шветочносц почнє у церкви на 16,30 г. з Молебеном до Богородици, хтори будзе  предводзиц апостолски еґзарх за грекокатолїкох у Сербиї владика Георгий Джуджар, а по Молебену у сали парохиї будзе отворена вистава вязана за спомнути ювилеї –  старих документох, образох и кнїжкох.

У сали Театру „Добрица Милутинович” на 18 г. будзе Шветочна академия, хтору зоз своїма секциями пририхтали руски и українски здруженя з Митровици – „Руснак” и „Коломийка”. Госци на програми буду Хор „Гармония” з Нового Саду и КУД „Калїна“ з Индїї, а на Академиї буду додзелєни и подзекованя заслужним за материялне и духовне доприношенє церкви у Митровици.

На означованю двох значних ювилейох сримскомитровчанє на ютре обчекую приход госцох з наших парохийох, Националного совиту Руснацох, представительох Городу Сримска Митровица и других вирских заєднїцох у городзе.

ПОВЯЗАНИ ТЕКСТИ