СРИМСКА МИТРОВИЦА – У Сримскей Митровици нєшка, 29. октобра, будзе шветочносц з нагоди 130-рочнїци грекокатолїцкей парохиї и 110-рочнїци грекокатолїцкей церкви Вознесеня Господнього у тим городзе.
Шветочносц почнє у церкви на 16,30 г. з Молебеном до Богородици, хтори будзе предводзиц апостолски еґзарх за грекокатолїкох у Сербиї владика Георгий Джуджар, а по Молебену у сали парохиї будзе отворена вистава вязана за спомнути ювилеї – старих документох, образох и кнїжкох.
У сали Театру „Добрица Милутинович” на 18 г. будзе Шветочна академия, хтору зоз своїма секциями пририхтали руски и українски здруженя з Митровици – „Руснак” и „Коломийка”. Госци на програми буду Хор „Гармония” з Нового Саду и КУД „Калїна“ з Индїї, а на Академиї буду додзелєни и подзекованя заслужним за материялне и духовне доприношенє церкви у Митровици.
На означованю двох значних ювилейох сримскомитровчанє обчекую приход госцох з наших парохийох, Националного совиту Руснацох, представительох Городу Сримска Митровица и других вирских заєднїцох у городзе.