ВЕРБАС – Вчера, 31. юлия, у нововербаскей грекокатолїцкей церкви св. Владимира преславени Кирбай. Швето св. Владимира ше по юлиянским календаре означує 28. юлия, алє ше Кирбай преклада на нєдзелю.
Архиєрейску Службу Божу служел апостолски еґзарх, владика Георгий Джуджар, а сослужели парох беоґрадски и сримскомитровицки о. Владислав Варґа, парох коцурски о. Владислав Рац и парох старовербаски о. Алексий Гудак.
Пред Службу владика Георгий пошвецел уход до церкви, як и нови крилос, хтори даровала Општина Вербас, так же на Служби присуствовал и предсидатель Општини Вербас Милан Ґлушац. Шицких присутних привитал нововербаски парох о. Иґор Вовк.
На Кирбайскей Служби Божей церква була полна з вирнїками, пред Службу вирних споведали о. Кандрач и о. Салак, а на концу Богослуженя було мированє.
