НОВИ САД – У пейдзешатим тогорочним чишлє новинох „Руске слово” рубрика „Тижньовнїк” спатра яка будучносц самодоприносу у Руским Керестуре, а преноши и упечатки з Манифестациї „Мозаїк Сербиї”, док рубрика „Нашо места”, медзи иншим, пише о бриґох у вербаским Явним подприємстве за превоз путнїкох и о реорґанизациї явних подприємствох по наших местох.
„Култура и просвита” розпатра чи школяре читаю школску лектиру, а часц тей рубрики пошвецена нашим двом манифестацийом – Рускому фестивалу малих сценских формох „Дюра Папгаргаї” и Дньом Миколи М. Кочиша.
Рубрика „Людзе, роки, живот” упознава читачох зоз Зденку Намачински з Вербасу, а на бокох „Економиї” представени медзинародни проєкт у хторим участвує наш млади науковец др Ярослав Катона.
Попри рижних актуалносцох, „Духовни живот” на своїх бокох зазначує и сотруднїцтво рускокерестурскей парохиї з двома парохиями у Мадярскей, док рубрика „Спорт” звекшого пошвецена означованю 25-рочнїци Спортских бавискох „Яша Баков” и тогорочним резултатом на змаганьох керестурского Столнотениского клубу „Русин”.
Додаток у тим чишлє „Дом и фамелия”, дзе и нова „Женоблоґия”, а шлїдуюце число новинох видзе як двочисло 30. децембра.
„Руске слово” у тим чишлє шицким читачом подаровало мурови календар.