НОВИ САД – У тогорочним штерацец першим чишлє новинох „Руске слово” рубрика „Тижньовнїк” розпатра ситуацию у шидскей општини пре миґрантску кризу, а зазначене и законченє проєкту НАР-у.
На бокох „Наших местох” пише о збераню и рециклажи секундарних сировинох у Дюрдьове и Шидзе, ту и вистки з Коцура, Нового Орахова, док „Економия” пише о искустве наших польопривреднїкох з цукрову цвиклу, та о зогриваню тей жими у Керестуре.
„Култура и просвита” звекшого пошвецена означованю Дзецинского тижня у Руским Керестуре, Коцуре, Шиду, Дюрдьове и Вербаше, а ту и напис о програми з нагоди „Поетских нїткох Меланиї Павлович” у керестурскей школи. Окремни текст пошвецени прешлотижньовому „Колу за Ґиниса”, у хторим участвовали и Руснаци.
„Мозаїк” представя двоїх успишних младих – студентку Маю Бодваи з Руского Керестура, котра студира китайски язик и Бояна Колошняя, докторанда информатики у Минхену, у Нємецкей.
Рубрика „Людзе, роки, живот” пише о Емилови Гудакови, привредному и културному дїячови з Руского Керестура, а рубрика „Духовни живот” о преслави Кирбаю у Старим Вербаше и обуки волонтерох у Каритасу.
„Спорт” зазначел резултати наших фодбалских клубох у їх змагательних лиґох, алє и успихи младих каратискох и атлетичарох.
У тим чишлє обявени и додаток „Дом и фамелия”, пошвецени октобру – Мешацу старших, а вишло и нове предлуженє „Женоблоґиї”.