НОВИ САД – Тогорочне пейдзешате число новинох „Руске слово” приноши винчованку кир Георгия Джуджара з нагоди наиходзацих шветох, а рубрика „Тижньовнїк” пише о законченю першей часци конзервациї неґативох Бруґошових фотоґрафийох у Руским Керестуре и розпатра стан у дружтве, кед слово о насилстве над женами
На бокох рубрики „Нашо места” актуалносци з обласци здравя у Шидзе и Вербаше, ту и вистки з општини Жабель, а рубрика „Економия” преноши искуства у дїлованю Ивана Ґубаша з Коцура, та спатра одгуки совитованя о овоцарстве.
„Култура и просвита” пише о рочних концертох КПД „Дюра Киш” у Шидзе и Руского културного центру у Новим Садзе, як и о Шветочней академиї Руснацох у Сримскей Митровици. Медзи иншим, ту зазначене и о Подзекованю хторе достал наш часопис за дзеци „Заградка“.
Рубрика „Духовни живот” на своїх бокох пише о означованю „Дня каритасох 2015” у Новим Садзе, док на бокох рубрики „Людзе, роки, живот” текст о шивачки Аранки Маґоч з Коцура.
О музично-литературних програмох за младих у Новим Садзе и Шидзе пише на „Мозаїку”, на „Спорту” представени Мирослав Хома з Нового Саду, а як додаток вишол „Дом и фамелия”, дзе и остатня тогорочна „Женоблоґия”.
У тим чишлє читачом даруєме мурови календар, а шлїдуюце, остатнє тогорочне число новинох, видзе 29. децембра.