НОВИ САД – У трицец другим чишлє новинох „Руске слово” рубрика „Тижньовнїк” анализує стан у медийох хтори приватизовани прешлого року, а зазначени и активносци локалней самоуправи у Шидзе у шветлє миґрантскей кризи.
На бокох рубрики „Нашо места” пише о новей порцийней политики у видаваню квартельох, а ту и вистки о виберанкох за совити месних заєднїцох у жабельскей општини и актуалносци зоз шидскей општини.
На бокох „Економиї” пише о вивозу черешньох зоз Шиду до Русиї, а свойо потерашнї искуства у польопривреди читачом преноши Иґор Бесерминї з Нового Орахова.
„Култура и просвита” анализує ситуацию у хторей ше нашли вични студенти, информує о представяню литератури за дзеци на ромским язику у Коцуре, а у тей рубрики наявени и Фестивал жридлового шпиваня „Най ше нє забудзе” у Дюрдьове.
„Мозаїк” понука текст о студентских путованьох до Америки и дава звит зоз стретнуца поетох у Руским Керестуре, док рубрика „Людзе, роки, живот” читачом представя два интересантни фамелиї – Хромишову з Дюрдьова и фамелию Мелани Бушовей з Коцура.
„Духовни живот” зазначел привит мощох блаженей Йосафати Гордашевскей у Коцуре, а ту и текст о означованю 300-рочнїци святилїща Мариї Текийскей у Петроварадину.
Рубрика „Спорт” пише о законченим турниру у вельким фодбалу за сениорох у рамикох СБ „Яша Баков”, а окремна увага пошвецена историї традицийного Ноцного турнира у малим фодбалє у Руским Керестуре.