НОВИ САД – У тогорочним oсемнастим чишлє новинох „Руске слово” рубрика „Тижньовнїк“ пише о конституованю Републичного совиту за национални меншини, а предлужує и провадзенє актуалней приватизациї медийох.
Рубрика „Нашо места” зазначела преславу Швета роботи по наших местох, та преберанє длужносци нового секретара Месней заєднїци Руски Керестур, а „Економия” пише о субвенцийох у польопривреди.
„Култура и просвита” представя руску Ґимназию у Руским Керестуре як и коцурского дїяча Дюру Макая котри того року означує два свойо ювилеї, а ту и звит з Литературного вечару у Вербаше хтори бул пошвецени академикови Юлиянови Тамашови.
„Мозаїк” и у тим чишлє новинох пише о волонтеризме младих, з тей нагоди у Коцуре, а ту и напис о Шветовей спортскей штафети.
„Духовни живот” у знаку означованя 100-рочнїци приходу шестрох служебнїцох до Коцура, док на бокох рубрики „Людзе, роки, живот” мож пречитац о интересантним живоце Дюру Михальовского, найстаршого жителя у Дюрдьове. Ту и осме предлуженє фельтону о двох рочнїцох нашей Установи.
Попри зазначених резултатох наших фодбалских клубох, „Спорт” пише о падобранских дньох Ивана Папуґи з Вербасу, а як додаток вишла „Дикица”.