НОВИ САД – У двацетим тогорочним чишлє, новини „Руске слово” на бокох „Тижньовнїка” приноша информациї з осмей схадзки Националного совиту Руснацох отриманей у Руским Керестуре, а ту и вистка о уручованю ключох и значеню новей комби-превозки хтору Руснаци у Сриме достали од Националного совиту.
Рубрика „Нашо места” зазначує отверанє 83. Медзинародного польопривредного сайму у Новим Садзе и як нашо парохиянє дожили Пасху на паломнїцтве у України. На бокох тей рубирки мож пречитац и о означованю Дня побиди у Руским Керестуре з амбасадором України, як и о преслави 70-рочнїци коцурского Активу женох.
Боки „Економиї” пошвецени кризи млєкарства у Коцуре, а на „Култури и просвити” информациї о ретроспективней вистави Силвестера Макая у Заводзе за културу войводянских Руснацох, о промоциї Одсеку за русинистику у керестурскей Школи, Дзецинским концерту у Керестуре, як и о солистичним концерту Ани Римаровей у Новим Садзе. На истих бокох и информациї о пририхтованю Фестивалу „Червена ружа”, як и рочнїцох хтори означени у Новим Орахове.
„Людзе, роки, живот” з тей нагоди представяю писателя Миколу Шанту и дзияка з Пишкуревцох Михала Панковича, а „Духовни живот” преноши атмосферу з велькей подїї на Завитни дзень у Водици – з нагоди преглашованя за тирваце одпустове место.
Спортски боки пишу о нових успихох нашого атлетичара Михаила Дудаша и пионирскей селекциї КК „Вербас”, а як узвичаєне, ту и резултати зоз змаганьох екипоз з наших местох у їх лиґох.