НОВИ САД – У двацец шестим тогорочним чишлє новинох „Руске слово” рубрика „Тижньовнїк” пише о схадзкох скупштини Новинарскей асоцияциї НАР, а „Нашо места”, медзи иншим, пишу о госцованю Катедралного хору з Крижевцох у Беоґрадзе, Першей причасци у Дюрдьове, та о хаснованю каплїчкох на теметовох у шидскей општини.
На „Економиї” текст о Керестурским сайме (з хторого фотоґрафиї и на остатнїм боку-рамику новинох), як и о початку жатви жита.
„Култура и просвита” векшу часц свойого простору пошвецує Ин мемориаму нєсподзивано упокоєному Юлиянови Рамачови Чамови, а ту и тексти о Музично-фолклорним вечаре у Дюрдьове, та о Фестивалє „Булевар букет” у Новим Садзе, на хторим участвовали и Руснаци.
Рубрика „Людзе, роки, живот” представя Дюру Уйфалушия з Дюрдьова, а пише и о златней свадзби Верунки и Данила Надьових з Бачинцох.
На „Духовним живоце” читаче вецей дознаю о Православним соборе на Криту и Реґионалней конференциї за помоц католїцким церквом на Балканє, док „Спорт” информує о Турнире у одбойки у рамикох СБ „Яша Баков”, а ту и розгварка зоз шветово припознату бодибилдерку з Керестура Илону Геку Зарубица.
Додаток у тим чишлє „Литературне слово”.