НОВИ САД – Вишло тогорочне друге двочисло, 18-19, наших новинох „Руске слово”, у котрим рубрика „Тижньовнїк” дава информацию о обявених резултатох покраїнских конкурсох на котри конкуровали нашо здруженя, а „Нашо места” понукаю актуални вистки зоз Руского Керестура и Дюрдьова, як и прегляд о тим як преславени Перши май по наших местох.
На бокох рубрики „Духовни живот” зазначене як преславена Велька ноц и Дзуря у наших парохийох цо ше ровнаю по юлиянским календаре.
У рубрики „Економия” дати совити о пирсканю ярнїх польопривредних културох процив хоротох и коровча, а ту и звит о приходу министра Недимовича до Коцура концом априла.
„Култура и просвита” зазначела Вельконоцни концерт у Дюрдьове, седми Днї театра „Владимир Сабо-Дайко” у Коцуре.
Рубрика „Людзе, роки, живот” дава нове предлуженє фельтону „Ґу 100-рочнїци од снованя РНПД-а” и напис о археолоґийним подручу у шидскей општини, а читаче можу упознац Марию Блотней зоз Осиєку.
„Мозаїк” понука пречитац интересантну приповедку Йована Живковича зоз путованя до Тайланду дзе достал трецу награду за кратки филм.
На „Спорту” напис о роботи Женского рукометного клубу „Русин”, а дати и резултати наших фодбалских клубох у своїх першенствених лиґох.