НОВИ САД – Мала школа иконописательства „Божи дар” будзе орґанизована у Новим Садзе од 6. по 18. юний, буду ю водзиц Надїя Карватска, уметнїца-иконописателька и Вира Бродович зоз України.
До Малей школи иконописательства можу ше уписац шицки котри жадаю научиц основи писаня иконох, без огляду чи то дакеди робели або нє, будзе тирвац 10 днї, а на иконох ше будзе робиц по 7 годзини дньово.
Цена школи по особи 150 еври, а до нєй ураховани шицок потребни материял. Кажде годзен на концу школи свою роботу однєсц дому, як и звишок материялу з котрого и дома годзен написац дацо по власней дзеки.
Курс ше будзе отримовац у церковней сали св. Миколая при грекокатолїцкей церкви св. Петра и Павла у Новим Садзе, а на концу школи, 19. юния, плановане и пошвецанє написаних иконох.
Заинтересовани особи, котри ше жадаю уписац до Малей школи иконописательства, можу ше явиц Гелени Бабич, предсидательки Културней ради при парохиї у Новим Садзе, на телефон 064 6521262, або писац у електронскей форми на: helenababic13@yahoo.com.