У Новим Садзе основани Реґионални наукови центер

автор зам
867 Опатрене

НОВИ САД – У Ґалериї Матици сербскей у Новим Садзе стреду, 29. юния, представени новоосновани Реґионални наукови центер Институту за филозофию и дружтвену теорию Универзитету у Беоґрадзе.

Як поведзене на шветочносци, на хторей присуствовали и помоцнїк министра просвити, науки и технолоґийного розвою Никола Танич и предсидатель Скупштини Войводини Иштван Пастор, то перши науково-виглєдовацки центер з обласци гуманистики и дружтвеней теориї у Войводини, а Центер будзе орґанизовац числени науково сходи и трибини у Новим Садзе и у Войводини.

– Наука у Войводини сконцентрована на Универзитету, а снованє того центру крочай напредок за тоти дружтвени гуманистични науки хтори нє заступени на Универзитету – гварел на представяню Центру помоцнїк министра просвити Никола Танич, док представителє новооснованого Центру Марк Лошонц и Александар Маткович представели його програму роботи, наглашуюци же од єшенї почнє циклус трибинох о мултикултурализму, антифашизму, евоинтеґрацийох и феминизму.

Домашнї тиж поручели же до роботи уключа цо вецей виглєдовачох, же Центер нє будзе заварти у академским штредку, алє жада прицагнуц цо ширшу публику, младих виглєдовачох и шицких заинтересованих за теорийну робот. Ґу тому, Центер ше будзе намагац повязац локалну, реґионалну и европску наукову заєднїцу.

ПОВЯЗАНИ ТЕКСТИ