НОВИ САД – Дом здравя „Нови Сад” од Институту за явне здравє Войводини питал ище дози вакцини процив ґрипи, понеже им од 9 000 остало лєм 200 дози. По податкох Институту за явне здравє „Батут”, за нєполни два мешаци од 243 206 вакцинох процив ґрипи потрошене 70,4 одсто.
– Набавку вакцинох зме плановали на основи количествох трошених за остатнї пейц роки, та нам того року сцигли 9 000 дози. Медзитим, Новосадянє совиснєйше послухали совити лїкарох и медийох, так же зме потрошели шицко цо зме мали – гварела за „Политику” координаторка за имунизацию Дому здравя „Нови Сад” Драґана Костадинович. Тиж додала же ше за найризичнєйших пациєнтох вше найдзе доза вакцини.
У Сербиї дотераз вакциновани коло 180 000 гражданє, медзитим, по стандардох Шветовей здравственей орґанизациї, тото число ище вше нє достаточне. Понеже тих дньох у Беоґрадзе изолована и потвердзена ґрипа у штирох случайох, предпоставя ше же поглєдованє за вакцинами будзе ище векше.
И того року вакцина тровалентна и ма вируси сезонских ґрипох – тип АХ1Н1 (пандемийска, лєбо швиньска ґрипа), як и АХ3Н2 и Б вирус. Защита од ґрипи активна два до три тижнї после вакцинованя.