НОВИ САД – З кладзеньом фундаменталного каменю, у кампусу Новосадского универзитету почала друга фаза вибудови Науково-технолоґийного парку, хтори оможлїви обезпечованє роботи за професорох и асистентох, та образованє ИТ- фаховцох. То будзе и єден зоз штирох таких центрох хтори би мали буц збудовани у идуцих штирох рокох.
Обєкт будзе змесцени на 29 000 квадратних метерох, дзе 10 000 кв/м буду наменєни за учальнї и лабораториї Факултету технїчних наукох (ФТН). Остаток простору наменєни компанийом хтори ту анґажую коло 3 000 нових роботнїкох.
Фундаментални камень символично положели министерка державней управи и локалней самоуправи Ана Брнабич, министер младежи и спорту Ваня Удовичич, предсидатель Покраїнскей влади Иґор Мирович, городоначалнїк Нового Саду Милош Вучевич, декан ФТН Раде Дорословачки и вивершни директор компаниї „Italiana Costruzioni“ Лука Наваро.
Предсидатель Покраїнскей влади Мирович визначел же Город, Покраїна и Република вєдно пририхтали тот проєкт и приведли го по реализацию. Министерка Ана Брнабич, котра и представителька ИТ-совиту у Влади Сербиї, з тей нагоди гварела же сущносц будуцого Науково-технолоґийного парку злучиц образованє и привреду.
