НОВИ САД – Пред вчерайшим отримованьом „Кола за Ґиниса”, у Новим Садзе представени Фестивал народного облєчива и прикраскох „Бисерни конар”. Фестивал всоботу, 3. октобра отримани у Футоґу, а участвовали културно-уметнїцки дружтва зоз Сербиї, Босни и Герцеґовини и Горватскей.
Пред отримованьом Фестивалу учашнїкох и орґанизаторох у Городскей хижи привитал шеф Кабинету городоначлнїка Нового Саду Александар Петрович, котри наглашел же Фестивал „Бисерни конар” и „Коло за Ґиниса” окреме значни прето же ше их отримує праве пред службеним придаваньом кандидатури Нового Саду за Европску престолнїцу култури.
После привиту, учашнїки ше прешпацирали по Новим Садзе – од Площи шлєбоди по Дунайски парк, а понеже их було вецей як 200, могло видзиц рижнородносц народних облєчивох националних заєднїцох у Войводини, Сербиї и ширше.
Фестивал „Бисерни конар” орґанизовал Културно-информативни центер „Младосц” з Футоґу, покровитель бул Город Нови Сад, а потимовку му дава и Покраїнски секретарият за културу и явне информованє. На скорейших фестивалох було приказоване и народне облєчиво Руснацох.