НОВИ САД – У нашей церкви у Новим Садзе вчера, на швето св. апостолох Петра и Павла по юлиянским календаре, преславени 196. Кирбай. И попри тим же бул роботни дзень и велька горучава, на Служби було вельо парохиянох и їх госцох, а з владиком, кир Георгийом Джуджаром, Службу Божу вчера дополадня служели дзевецме священїки з нашого Еґзархату.
Архиєрейску Службу Божу предводзел преосвящени владика Георгий, а сослужели декан бачки и парох дюрдьовски о. Йоаким Холошняй, парох керестурски о. Михайло Малацко и капелан о. Михайло Шанта, парох шидски о. Михайло Режак, парох коцурски о. Владислав Рац, парох ґосподїнски о. Михаил Холошняй, парох бачински о. Дарко Рац, капелан кулски о. Платон Салак и о. Роман Кандрач з України.
У своєй казанї владика Георгий гварел же святи апостол Петро перше бул рибар, єдноставни чловек зоз шицкима своїма людскима нєдостатками, алє му Бог дал виправиц свойо гришки и на його каменю поставиц свою церкву. Тиж так, и апостол Павло перше почитовал закон и прешлїдзовал християнох, а вец ше преобрацел.
На Служби шпивал Хор грекокатолїцкей церкви св. Петра и Павла и Руского културного центру „Гармония”, под дириґентством Весни Кесич Крсманович, а на Служби присуствовали и домашнї парох о. Юлиян Рац и пензионовани новосадски парох о. Роман Миз, як и Йосип Вранич з дяковского владичества.
На концу Служби було мированє, а по обисцох новосадских парохиянох преслава Кирбаю предлужена з госцами и приятелями.