НОВИ САД – Наиходзаци дочек Нового 2017. року у Новим Садзе будзе єден з богатших, понеже за три днї, од 30. децембра по 1. януар, на штирох локацийох наступя коло 100 виводзаче, а главне мено на дочеку будзе популарни шпивач Здравко Чолич, наявене того тижня на представяню Новорочней програми у Городскей хижи.
Найвецей змисти будзе на Площи републики, дзе од 30. децембра по 1. януар наступя „Ирие ФР”, „Земля ґрува”, „Драм ен Зез”, „Джез комбинат”, „Йосип А Лисац”, „Бранимир и неприятелї”, Ана Перишич, Милена Янчурич.
Остатнього дня 2016. року у Дунайским парку буду змисти за дзеци, а на главней бини пред концертом Здравка Чолича наступя „Новосадски биґ бенд” зоз Новосадским камерним хором.
У „Студию М” за Нови рок наступя вецей як 10 домашнї и иножемни ди-джейове, а пре огранїчени простор, то єдина локация дзе ше уход будзе наплацовац.
За дочек Нового року по юлиянским календаре на Площи шлебоди наступя Оркестер Бобана Марковича и „Симфонийни оркестер 2021”.
Городоначалнїк Нового Саду Милош Вучевич на представяню програми нє сцел бешедовац о тим кельо дочеки буду коштац, алє наглашел же, окрем трошкох за анґажованє служби за явни порядок, шицко виплаца спонзоре.
У Новим Садзе тих дньох порушана и петиция з хтору нєформална ґрупа „Новосадска патрола” поволує городску власц най одустанє од орґанизованя преслави Нового року, а пенєж хтори наменєла за дочек подарує за гуманитарни акциї.