РУСКИ КЕРЕСТУР – Прешлей нєдзелї у парохиї св. оца Миколая у Руским Керестуре вишло 4. тогорочне число Християнского часопису „Дзвони”.
У „Дзвонох” и поволанка нашого владики Георгия Джуджара на Завитни дзень по григориянским календаре – 17. мая на 11 годзин до Водици – дзе будзе Архиєрейска Служба Божа. На нєй у Року милосердия годно достац полни одпуст, а будзе означене и приманє Водици до заєднїци з папску базилику Святей Мариї Велькей у Риме. Владика на тото збуванє поволує вирних зоз шицких парохийох нашого Егзархату.
Часопис приноши и папову поволанки за помоц загроженим у України пре войну, зоз шведоченями о конкретней помоци фамелийом, а ту и напис о живоце у Сириї, дзе тиж панує война.
Рубрика „Рочнїци” пошвецена двом парохом у Сримскей Митровици з нагоди 130-рочнїци снованя тамтейшей грекокатолїцкей парохиї, а з нагоди 70-рокох Псевдособору у Львове, у рубрики „Стереотипи” запис о Гавриїлови Костельникови.
Нови „Дзвони” приноша и звити зоз живота и подїйох у наших парохийох, християнски шведоченя, духовну поезию, малюнки виронаучних дзецох з Нового Саду и Коцура и други стаємни рубрики.