НОВИ САД – Пондзелок, 15. фебруара, у Новим Садзе отримана сновательна схадзка Союзу културно-уметнїцких дружтвох (КУД) Сербиї, до хторого приступели коло 40 КУД-и, медзи нїма и Руски културни центер з Нового Саду. Шедзиско Союзу у Новим Садзе, а за предсидателя Предсидательства Союзу вибрани Милорад Лонич, предсидатель КУД „Желєзнїчар” з Нового Саду.
Снованє Союзу порушали представителє вельких КУД-ох зоз Сербиї пре потребу за фаховим здруженьом хторе будзе координовац и представяц уметнїцки, културни и дружтвено-воспитни цилї своїх членох и витворйовац заєднїцки интереси при державних и медзинародних институцийох з хторима КУД-и поряднє сотрудзую.
Союз будзе и едуковац хореоґрафох на шицких уровньох, лиценцовац хореоґрафох, будзе окончовац законску защиту авторских хореоґрафийох и подзвиговац уровень уметнїцкого виводзеня оркестрох, хорох, вокалних солистох и шпивацких ґрупох.
Єден з приоритетох у роботи Союзу будзе и пременка статусу КУД-ох, хтори тераз на уровню здруженя гражданох, та наявене же, пре рпозпатранє того питаня, Союз пошвидко иницирує схадзки з компетентнима министерствами и другима державнима институциями.