НОВИ САД – Анализуюци нащивеносц нашого сайту www.ruskeslovo.com у першей половки рока (од 1. януара по 30. юний), податки указали же вецей як 15 000 особи сайт нащивели вецей як 53 502 раз.
Таке вельке число нащивох сиґурно вязане за Новинску аґенцию „Рутенпрес”, хтора каждодньово пласує информациї на руским и сербским язику. Окрем Рутенпресу, на сайту ше находза шицки виданя НВУ „Руске слово”, рубрики „Стари фотоґрафиї” и „Рецепти”, як и дзепоєдни сервисни информациї.
Окремне доприношенє нащивеносци сайту дава и дружтвена мрежа Фейсбук, на хторей наша Установа ма свой бок – www.facebook.com/ruskeslovo, дзе тиж пласуєме информациї.
Нащивителє сайту найвецей опатрали ґалерию фотоґрафийох з тогорочного Фестивалу „Червена ружа” (732), алє и першу наяву „Ружи” (442), як и новши текст о побиднїкох змаганя за глас и забавних композициї (346), потим текст о чисценю базену у Руским Керестуре (689), о докторованю Ясни Папуґа у Белґиї (648), Младежским балє у Керестуре (541) и други.
Найвецей нащивительох сайту єст зоз Сербиї (Нови Сад, Беоґрад, Кралєво… – 78 одсто), потим з Канади (Норт Батлфорд, Киченер, Саскатун…- 5 одсто), а ту и читаче з Горватскей, Нємецкей, Русиї, ЗАД, України, Словацкей и других державох швета.
Найвекше число нащивительох спада до ґрупи медзи 25 и 34 роки – 33,5 одсто, нащивительох од 18 до 24 роки було 27,5 одсто, а од 35 до 44 роки 15,5 одсто. То потвердзує и лїстина найчитанших текстох, бо су найвецей праве о младих.
Дзекуєме шицким хтори каждодньово провадза наш сайт, а ми ше и надалєй будземе трудзиц на час и точно информовац о рижних збуваньох, як и унапредзовац сайт.
