ПЕТРОВАРАДИН – Зоз Службу Божу, хтору предводзел апостолски нунций у Сербиї монс. Лучиано Суриани з владиками, медзи котрима були и наш еґзарх, кир Георгий Джуджар, православни епископ бачки Ириней, викарни владика єґарски Єроним, та з велїма священїками, монахинями и вирнима з рижних местох, штварток, 4. авґуста, у Петроварадину означена ювилейна завитна побожносц – святилїща Мариї Текийскей.
У духу єдинства, Євангелия и молитви читани на язикох паломнїкох котри участвовали у евхаристихним славеню, та так по церковнославянски читал парох новосадски о. Юлиян Рац, а молитви по руски дзияк Йовґен Надь.
Апостолски нунций у Сербиї монс. Лучиано Суриани у мено папи Франциска на концу Служби благословел шицких присутних, а пред Богослуженьом отримана пригодна духовно-музична програма, на хторей участвовали Ґрупа РиМ зоз Заґребу и Вокално-инструментални состав „Текиї” з Петроварадину.
З нагоди ювилею сримски владика монс. Дюро Ґашпарович 3. авґуста, под вонкашнїм олтаром церкви, отворел Музей Владического святилїща Мариї Текийскей – збирку фотоґрафийох, погляднїцох и експонатох хтори шведоча о паломнїцтвох и вирско-завитней димензиї того святилїща на Текийох. Вистава хронолоґийно-тематского типу и од отвераня є доступна шицким заинтересованим.
Тиж, у атриюме Музею Городу Нового Саду на Твердинї прешлого тижня едукативно представена велька битка коло 300 000 воякох – османлийох и християнох, хтора була 5. авґуста 1716. року. Виложени ориґинални предмети, репродукциї вельких мапох з Бечу, макета битки, оружиє, тедишнї пенєж и рижни звити, а вистава витворена и з потримовку городских институцийох и Покраїни.
Орґанизаторе преслави Сримске владичество, Владическе святилїще Мариї Текийскей и нємецке здруженє „Донау”, чийо члени, вєдно з хором, участвовали на Служби на нємецким язику, а у рамикох преслави ювилею у октобру предвидзени наукови сход и подобова вистава.
