ПЕТРОВЦИ (ГОРВАТСКА) – У Петровцох у Горватскей нєшка, 8. октобра, будзе Културна програма „Кед голубица лєцела”, хтору орґанизує Дружтво Руснацох у Републики Горватскей (РГ) „Руснак”, а у соорґанизациї з Општину Стари Янковци, Месним одбором Петровци и КУД „Яким Гарди” з Петровцох.
Програма манифестациї „Кед голубица лєцела” почнє на 19 г., а попри домашнїх шпивачох и других уметнїкох з Дружтво „Руснак” и КУД „Яким Гарди” з Петровцох, буду участвовац и шпивацки ґрупи КУД Руснацох Осиєку, КУД „Яким Ґовля” з Миклошевцох и КУД „Осиф Костелник” з Вуковару.
Тиж так, наявени наступ шпивачох, поетох и рецитаторох зоз здруженьох Русинох/Руснацох/Лемкох (РРЛ) з вецей жемох-членїцох Шветового конґресу РРЛ, як цо то „Рутения” з Братислави, поетове зоз Сербиї, та шпивацка ґрупа КПД „Карпати” з Вербасу.
Програму ше отримує у знаку 25-рочнїци снованя Шветового конґресу РРЛ, под покровительством Совиту за национални меншини РГ, а сопокровителє општини Боґдановци и Стари Янковци, Рада рускей националней меншини Городу Вуковар, Представитель рускей меншини Городу Заґреб, соборски заступнїк и за руску меншину Велько Кайтази и Вуковарско-сримска жупания.