У Покраїнскей Скупштини оштра полемика о буджету за 2016. рок

автор сен
778 Опатрене

НОВИ САД – На 49. схадзки Скупштини АП Войводини, хтора отримана пияток, 11. децембра, посланїки принєсли одлуки о кадрових пременкох у Покраїнским Омбудсману, на факултетох Универзитету у Новим Садзе, а найоштрейша розправа була о буджету за 2015. и 2016. рок, пренєсли нашо медиї.

З векшину гласох прилапени Звит о запровадзованю Покраїнскей скупштинскей одлуки о буджету АПВ од яунара по септембер 2015. року, о чим водзена оштра розправа. Як гварели демократи – „у цеку рока покраїнски буджет церпел пошлїдки мачоховского одношеня Републики спрам Войводини”, док за напреднякох „буджет трошени катастрофално, з нєпреривним одбиваньом Покраїнскей влади же би шпоровала”.

Гоч з опозициї наявели же буду вимагац задзекованє покраїнского секретара за финансиї Зорана Радомана, то заш лєм нє зробене.

Бешедоване и о наяви Лиґи социялдемократох Войводини же Уставному суду поднєше жалбу пре Предлог републичного буджету, з хторим ше, як гваря, Войводини знова нє дава по закону предвидзени 7 одсто.

Скупштина констатовала же тром заменїком Покраїнского защитнїка гражданох-омбудсмана – Стеванови Арамбашичови, Драґомирови Секуличови и Еви Вукашинович вишол мандат. По прешлей скупштинскей одлуки, Омбудсман мал пейцох заменїкох, а у складзе з нову скупштинску одлуку штирох, так же посланїки вибрали двох. З векшину гласох за заменїцу за права националних маншинох знова вибрана Ева Вукашинович, а за нєспециялизовану заменїцу Анико Ширкова, котрей то перши мандат.

Розришени член Надпатраюцого одбору Ґаранцийного фонду АП Войводини и принєшена Одлука о менованю нового члена.

Скупштина пре виходзенє мандату принєсла и Одлуку о розришеню членох совитох: Универзитету у Новим Садзе, Польопривредного, Филозофского, Технолоґийного, Правного, Медицинского и Природно-математичного факултету, Академиї уметносцох у Новим Садзе, Факултету технїчних наукох и Факултету спорту и физичного воспитаня у Новим Садзе, Економского и Будовательного факултету у Суботици, Педаґоґийного факултету у Зомборе, та Технїчного факлтету у Зренянину. На истей схадзки меновани и нови члени совитох наведзених установох.

Посланїки прилапели Звит о витворйованю реґионалного просторного плану АПВ за 2014. рок, та принєсли Покраїнску скупштинску одлуку о вименкох и дополнєньох Одлуки о снованю Туристичней орґанизациї Войводини.

ПОВЯЗАНИ ТЕКСТИ