У приватних подприємствох барз мало синдикални орґанизациї

автор ртв/зам
997 Опатрене

НОВИ САД – И попри тим же є оможлївене и реґуловане зоз законом, синдикалне орґанизованє у приватних подприємствох у Сербиї баржей винїмок, як пракса, насампредз пре вельку нєзанятосц, односно страх од траценя роботи, преноши РТВ  думаня синдикатох и роботодавательох.

У синдикалних правох „уживаю” углавним заняти у явним секторе, а кед же и єст притужби на рахунок приватних роботодавательох, нєт податки о тим чи дахто з нїх на даяки способ и покарани пре забраньованє синдикалного орґанизованя.

На орґанизовану защиту роботнїцких правох прейґ синдикалней орґанизациї маю право шицки заняти, медзитим, синдикатох нєт у приватних подприємствох, за цо роботодавателє и держава обвинюю синдикати, а синдикати ше вигваряю на страх занятих – виглєдовала РТВ.

– Попри траценя живота, у Сербиї нєшка найвекши страх од траценя роботи, та зняюци за тото, роботодавателє уценюю велїх занятих – гварел Ґоран Милич зоз Союзу самостойних синдикатох Войводини и додал же, як наявене, до конца идуцого рока будзе принєшени нови закон о роботи, спомина ше закони и о синдикатох, та обчекує же ше дацо пременї.

Покраїнски секретар за привреду Иван Дьокович о тей теми гварел же ше насампредз ношителє синдикалного орґанизованя маю вибориц за свойо права, а держава твори правни рамики за законодавство у обласци роботи. Тиж гварел же ше на уровню АПВ спомина и колективни контракт, а по його думаню, з трипартитним диялоґом треба найсц найлєпше ришенє за роботнїкох.

– Закон шицко реґуловал, алє у пракси нє треба гамовац його запровадзованє. Думам же то баржей робота самих синдикатох, вони ше муша орґанизовац, анимировац занятих у приватних фирмох на синдикалне орґанизованє, бо нєприродне же ше у социялно-економским диялоґу нєшка прегваря лєм зоз синдикатами у явних подприємствох. Треба лєм стриктно почитовац постояци закони – визначел Станко Крстин з Униї роботодавательох Войводини.

 

ПОВЯЗАНИ ТЕКСТИ