НОВИ САД – Явна медийна установа „Радио-телевизия Войводини” вчера означела свой Дзень, а як и други тогорочни рижни програми тей медийней хижи, означени є у рамикох означованя 40-рочнїци Радио-телевизиї Войводини (РТВ) 66-рочнїци Радио Нового Саду (РНС) и 50-рочнїци „Студия М”.
На окремней шветочносци за занятих и бувших занятих у Радию и Телевизиї Войводини, пияток, 27. новембра додзелєни и традицийни Рочни награди РТВ, хтору того року достала и редакторка Програми на руским язику РНС Златица Няради. Попри за позарядову роботу, Нярадийова Награду достала и за анґажованє у орґанизованю Фестивалу РТВ „Ружова заградка”.
Пред 40 роками, 27. новембра 1975. року, на 19,30 годзин з теди нового будинку Телевизиї Нови Сад з Мишелуку – емитовани перши Дневник, цо була перша урядова емисия емитована до етру з новосадского студия. Од самого початку Телевизия Нови Сад (ТВНС) емитовала програму на пейцох язикох: сербским, мадярским, румунским словацким и руским (цо послужело и за идейне ришенє першого лоґа ТВНС – бленду з пейцом полями), а тераз Радио-телевизиї Войводини (РТВ) емитує програму на 10 язикох 24 годзини дньово и з тим є лидер у регионє и вироятно рекордер у Европи.
З нагоди 40-рочнїци, ґенерални директор РТВ Срдян Михайлович гварел же тота медийна хижа нєшка твори програму хтора по змисту, квалитету и стандарду сполнює шицки условия хтори поставени за прави явни сервис.
– Удало ше нам обезпечиц и интересантну филмску и серийну програму, а досц зме уложели до дзецинскей и младежскей програми, та ше наздаваме резултатом. Сцеме прицагнуц и младу публику, цо проблем шицких явних сервисох у реґиону – оценєл Михайлович
– Гражданє ше питаю чи нам потребни явни сервис и чи то дацо цо превозидзене у чаше кабловских телевизийох. Медзитим, то насампредз право гражданох и европска и цивилизацина вредносц – гварел Михайлович.
Кед слово о предплати, Михайлович обчекує же тот способ финансованя явних сервисох будзе хасновити, а же явни сервиси поробя шицко же би оправдали довириє и обчекованя гражданох