РУСКИ КЕРЕСТУР – По трох конкурсох хтори розписала Национална служба за обезпечованє роботи, Явне комуналне подприємство (ЯКП) „Руском” обезпечело дочасову роботу 13 новим роботнїкох, з котрих дзевецеро буду робиц у Керестуре.
На конкурс за явни роботи „Руском” конкуровал за пейцох роботнїкох, а достал двох, котри буду робиц у Крущичу. Конкурс бул розписани и за анґажованє особох з физичнима, лєбо менталнима почежкосцами, дзе „Руском“ конкуровал за три особи, кельо и достал. З нїх два особи буду робиц у Керестуре, а єден у Крущичу.
Прейґ Општини Кула конкуроване и за анґажованє 10 особох за комунални роботи, а одобрене анґажованє 8 роботнїкох – дзе седем за Керестур. Плаца им будзе менша и од минималцу -15 000 динари.
Нови роботнїки почню робиц концом септембра, по контрактох су анґажовани на три мешаци, а як гварел директор „Рускому” Иґор Фейди, плановане же буду зберац лїсце, пописовац воду, розкерчовац критични места, фарбиц контейнери и друге.