После першомайских шветох, а ище интензивнєйше по Кирбаю, у Руским Керестуре почало пресадзованє паприґи, а понеже роботу очежує и претаргує спреведаца ярня хвиля, робота будзе тирвац по конєц мая. Того року у Керестуре єст коло 20 одсто вецей продуковательох.
Нєдостаток роботи и надїя за сиґурним пенєжом мотивує Керестурцох же би садзели паприґу, та нє чудо же паприґарох з рока на рок єст вше вецей. Нови продукователє провадза фахово совити и теорию, а стари ше операю на праксу и чераю искуства. Садзи ше и на стародавни способ – до фийовкох, алє найвецей на сучасни – на фолию, под систему залїваня „капка по капку”.
ПРЕСАДА НЄ ПОДЛА
– Прешли и тот тидзень „удерни” цо ше дотика пресадзованя паприґи, ми праве того тижня почали. Хвиля була спреведаца, цо ше одражело на квалитет нашей пресади. Раз зме одкривали, раз закривали пластенїки. У єдним пластенїку, дословно, у розмаку од даскельо центиметери, маме барз вельки одступаня у велькосци и квалитету пресади. Прейґ Здруженя паприґарох контактуєм зоз другима, та ше велї поносую на нєєднак розвити пресади – гвари Душица Орос зоз Здруженя паприґарох „Капсикум анум”.
Тоти цо ше им, пре рижни причини, хованє пресади нє удало, можу ю купиц за 10 еври по квадратним метеру, дознаваме у валалє. Понеже того року звекшане число Керестурцох котри ше опредзелєли продуковац паприґу, будзе и вецей поверхносци под тоту желєняву, медзитим обчекує ше же шицка паприґа найдзе свойого купца.
Михайло Грубеня
– Понеже зме потераз вше садзели на фийовки, тот рок нам „пробни” – посадзиме гольт и ферталь паприґи на фийовки, а на пол гольта на фолию, та кед ше добре укаже идуцого року, шицко будземе на фолию. Можем повесц же нам ше пресада удала и на точно будземе мац и за пресадзованє – гвари Михайло Грубеня, єден з паприґарох.
Малюш Чуни и його фамелия єдни зоз найвекших продуковательох паприґи у Керестуре, а зоз тим шее занїмаю уж вецей як 20 роки. Того року посадзели єденац гольти, а як гвари, и кед би сцели посадзиц вецей, у Керестуре чежко найсц и єден шлєбодни гольт за аренду. Но, и тото цо маю цалком им досц. Як и шицки длугорочни продукователє, роботи на жеми диктира искуство.
– Паприґу зме пресадзовали по першомайских шветох, а пред Кирбайом, кед температури були од 20 по 25 ступнї. У одношеню на искуства других паприґарох зоз пресаду, можем повесц же сом презадовольни и же того року можебуц була и лєпша як влонї. Мали зме 120 квадрати под пресаду и шицко зме похасновали – єдну часц ми посадзели, а тото цо остало, то зме предали – гвари Малюш.
ПАПРИҐУ НЄ МОЖ ОСИҐУРАЦ ОД ШИЦКОГО
Членїца Управного одбору Здруженя Душица Орос гвари же Здруженє достало вецей понукнуца за осиґуранє, а обачиц и же вше векше число паприґарох осиґурює паприґу. Мож повесц же ше тот процент у Керестуре аж и до 90 одсто.
Малюш Чуни
Укладанє лєм до єдного гольта паприґи виноши 2 500 евра, та паприґаре себе нє можу дошлєбодзиц ризик. До тей суми нє урахована и значна ставка – робота наднїчарох, цо за продуковательох ище єдна бриґа. Понеже, як ше гвари, кажде друге обисце у валалє садзи паприґу, у сезонох обераня и пресадзованя чежко найсц квалитетних роботнїкох, та ше кажди рок приводзи менєй и вецей искусних наднїчарох зоз сушедних местох, углавним з Кули, Лалитю, Крущичу, Коцура и Вербасу. Наднїци коло 170 динари на годзину, цо за паприґарох вельки трошок, окреме кед нє робя добре.
– Маме коло 18 своїх стайомних наднїчарох, котри уж роками робя у нас, алє вше нам треба голєм два раз вецей. Того року зме анґажовали коло 45 наднїчарох, та зме мали и зоз других местох. Нє задовольни зме, понеже велї з нїх першираз видзели паприґу и нє знали розликовац коровче од пресади. Кед зме им указали як ше роби, ютре пришли нови, котрих тиж требало учиц пресадзовац – бешедує Чуни.
Сиґурни пласман, чи прейґ накупцох, пияцох, чи орґанизованого одкупу мотивує и младих и старих же би ше опробовали у продукциї паприґи, а зоз искуства Керестурцох, и у сушедних местох єст вше вецей продуковательох хтори пробую вихасновац потенциял продукциї тей желєняви.
ДО КЕРЕСТУРА ИДУ 516 288 ДИНАРИ
Медзи 168 польопривреднїками котри достаню пенєж по Конкурсу за унапредзованє обласцох наводньованя, продукциї у пластенїкох, защити од каменцу, набавку опреми за фарми статку и преробок овоци и желєняви и дзешецеро Керестурци, котри достали вєдно 516 288 динари, дознава „Руске слово” у Покраїнским секретарияту за польопривреду, водопривреду и лєсарство.
Покраїна з тим Конкурсом рефундує укладаня до наведзених пейцох обласцох у висини од 30 до 50 одсто, а шицки 10 Керестурци достаню повратни средства за наводньованє.
