БЕОҐРАД – У одношеню на 2014., Сербия того року напредовала у обласци виєдначованя полох, та так з 54. места дошла на 45. – указую найновши податки Шветового економского форуму (ШЕФ).
ШЕФ анализовал 142 держави, а за остатнї дзешец роки ше указало же постої велька нєровноправносц у обласцох здравства, образованя, политики и економских можлївосцох. Жеми з найвисшим ступньом родней ровноправносци то Исланд, Финска, Норвежска и Шведска.
Того року Сербия найбаржей напредовала у критериюме заступеносци женох у политики. По числу женох у парламенту є на 27., а по числу женох на министерских позицийох на 51. месце.
У обласцох образованя Сербия на 52. месце, а у здравстве на 79. По критериюме економскей ровноправносци завжала 74., алє по єднакоци у плацох за исти роботи 103. место.
По родней ровноправносци Сербия ма лєпши пласман у одношеню на сушедни жеми: Горватска на 59., Македония на 69., Албания на 70., а Чарна Гора на 79. месце.
Гоч у 97 державох векшина студентох жени, лєм у 68 з нїх жени доминантни квалификовани роботнїки, а лєм у штирох державох жени доминирую на лидерских позицийох, указала анализа ШЕФ.