БЕОҐРАД – Цена роботней годзини у Сербиї єден евро, а у жемох Европскей униї досцигує аж 44,1 еври, кельо була прешлорочна цена роботней годзини у Белґиї. Окрем Белґиї, висока цена роботней годзина у Шведскей – 41,8 еври и у Данскей – 42,1 еври.
Прешлорочни податки указую же ше у Сербиї роби за найменшу плацу, а вецей. Роботни тидзень мал штреднє 42,7 годзини, а у других европских державох штреднє 40 годзини.
Социолоґ Сречко Михаилович толкує же познате же у Сербиї туня роботна моц, медзитим, поставел и питанє квалификованосци наших роботнїкох.
– Значне питанє кельо вони доросли сучаней технолоґиї. Обавам ше же наша роботна моц нє нательо квалификована, а пре вельку нєзанятосц є нє у цеку з технолоґийнима вимогами яку инвеститоре глєдаю од роботнїкох – гварел Михаилович.
Вон додава же єст вельо проблеми хтори одбиваю инвеститорох, а нє мож их занєдзбац, гоч кельо будземе зменшовац цену роботней моци.
– Прицагованє инвеститорох нє мож засновац лєм на тунєй роботней моци, а нє запитац ше цо з другима условиями хтори держава муши сполнїц же би мала инвеститорох. Цо з проблематичну администрацию, бирократию и предписанями… – заключел Михаилович.