РУСКИ КЕРЕСТУР/ПОПРАД (СЛОВАЦКА) – На пондзелок, 20. юлия, почина Лєтня школа руского язика, хтору орґанизує Одбор за образованє Националного совиту (НС) Руснацох. Тогорочна Лєтня школа руского язика за наших школярох будзе отримана на Горнїци, у Попрадзе у Словацкей, а тирва по 26. юлий.
На лєтнєй школи участвую коло 30-еро дзеци з висших класох основней школи зоз скоро шицких наших местох дзе настава порядна, лєбо ше ю орґанизує факултативно – з Руского Керестура, Коцура, Дюрдьова, Нового Саду (и його пригородских местох), Суботици, Нового Орахова, Бачкей Тополї, Вербасу, Шиду и Бикичу.
Руски язик, историю, та други змисти школяром буду преподавац и орґанизовац пецеро преподавателє, векшином просвитни роботнїки, з Керестура, Коцура, Орахова, Беркасова и Нового Саду.
Зоз школярами у Попрадзе буду и предсидатель Вивершного одбору НС Желько Ковач, директорка керестурскей Школи „Петро Кузмяк” Хелана Пашо Павлович и директор Заводу за културу войводянских Руснацох Серґей Тамаш, котри з дзепоєднима школами и институциями з обласци култури у Словацкей утвердза дальши конкретни крочаї на витворйованю Спорозуменя о медзиреґионалним сотруднїцтве медзи АП Войводину и Пряшовским самоуправним крайом.
