ШИД – У сали Културно-образовного центру Шид вчера з пригодну програму означени Медзинародни дзень мацеринского язика, а представени сербски, словацки, руски и горватски язик.
Представителє штирох дружтвох – ГКУД „Шид” СКУД „Єднота”, КПД „Дюра Киш” и СКУД „Святи Сава”, як и „Шидиянки” на початку вєдно одшпивали гимну Сербиї „Боже правде”, а потим през шпиванку, музику, танєц и поезию представени горватски, словацки, руски и сербски язик.
О Руснацох и руским язику присутних упознал заменїк предсидателя Рускей матки, член Националного совиту Руснацох и член Комисиї за културу Шветового конґресу Русинох/ Руснацох/Лемкох Миломир Шайтош, а Мишана шпивацка ґрупа КПД „Дюра Киш” одшпивала „Преквитай, преквитай” и „При мурику явор”. Мастер русинистики Зденко Лазор пречитал писню „Мойо гори”, з музичним провадзеньом оркестру КПД „Дюра Киш”.
На концу програми шицки учашнїки вєдно одшпивали шпиванку „Тамо далеко”, а орґанизаторе програми були Совит за национални меншини и Уния женох Општинского одбору Сербскей напредней странки Шид.