РУСКИ КЕРЕСТУР – Зоз преподаванями мр Гелени Медєши, длугорочней прекладательки и лекторки руского язика, вчера у Основней и штреднєй школи „Петро Кузмяк” у Руским Керестуре означени Медзинародни дзень мацеринского язика.
Мр Медєшова отримала два окремни преподаваня – єдно школяром висших класох основней школи, а друге ґимназиялцом з руских оддзелєньох, хторих провадзели їх професорки руского язика Ксения Шовш, Каролина Папуґа и Люпка Малацко. Госцинску привитала и директорка Школи Хелена Пашо Павлович, котра визначела значносц означованя Дня мацеринского язика.
У своїм викладаню Гелена Медєши школярох здогадла як и прецо настало означованє того дня, а визначела и прецо важне чувац и мерковац на свой мацерински язик хтори, як гварела, лєм так будзе длуго тирвац.
У интерактивней комуникациї зоз школярами Медєшова их упознала и зоз способами твореня нових словох у руским язику, а вєдно анализовали и правилне и нєправилне хаснованє одредзених словох и виразох у руским язику, цо облапене и у єй кнїжкох о язику хтори остатнї роки видало Дружтво за руски язик, литературу и културу.
