НОВИ САД – Спрам правилнїкох о школским календаре за основни и штреднї школи у АП Войводини за школски 2015/2016. рок, хтори принєсол покраїнски секретар за образованє Михаль Нїлаш, соботами вецей нє будзе настави.
Як наведзене у сообщеню Секретарияту, тота одлука принєшена нє лєм пре неґативни коментари о роботних соботох, алє и пре твердзенє же робота всоботу нїґда нє давала педаґоґийни ефекти.
Школски рок почнє 1. септембра (вовторок), а перше полроче будзе закончене 23. децембра 2015. року. Жимски розпуст будзе по 14. януар 2016. року, а у другим полрочу школяре буду мац два кратши одпочивки.